Baju Kasayangan

BAISUKAN itu Palui sungsung banar bangun. Imbah sembahyang subuh inya langsung babarasih halaman lalu mancibuk banyu gasan mandi. Imbah tuntung mandi bagagas basalawar.

“Napa hari ini sampiyan pina sungsung banar basalawar gawian,” ujar bini Palui managur.

“Hari ini aku tajanji wan pambakal handak umpat ka kantur kacamatan,” ujar Palui.

“Tapi tulaknya kada basusubuhan ini jua kalu?” ujar bininya.

“Ujar paribahasa umanya ai, labih baik badahulu daripada talambat,” sahut Palui.

“Tapi biasanya sampiyan paling palandungnya tulak ka kantur, kalu basusubuhan kaya ini pasti ada apa-apanya,” ujar bini Palui pina curiga.

“Aku maklum haja umanya ai, ikam curiga itu tanda cinta karas wan aku,” ujar Palui lihum mangibit pipi bininya.

“Kalu handak tulak basungsung kanapa maka balum babaju jua abahnya,” ujar bini Palui.

“Aku mulai tadi umanya ai jinguk-jinguk ka gantungan baju, ka lamari wan ka tuyukan baju gusukan, kada tatamu jua baju kasayanganku,” ujar Palui.

“Itu nah baju dinasnya, balipat,” ujar nang bini.

“Hari ini aku babaju bibas haja kada baju dinas. Aku handak mamakai baju sasirangan, baju kasayanganku,” ujar Palui.

“Baju sasirangan nang mana? Apakah yang balang kanas atawa nang balang gagatas?” ujar bininya.

“Baju kasayanganku nang balang bigi ramania,” ujar Palui.

“Ooooo… baju itukah,” ujar bininya takajut.

“Hi-ih, itu baju nang babalang nang paling kusayangi,” ujar Palui.

“Anu… anu, baju itu sudah ulun…,” ujar bininya.

“Ikam apakah bajuku itu?” ujar Palui bahimat batakun.

“Samalam ada yayasan urang miskin datang ka sini, bapintaan baju bakas pakaian, maka ulun pilihakan baju kasayangan sampiyan balang bigi raman itu,” ujar bininya bujur harus bapadah.

“Kanapa maka baju kasayanganku itu nang ikam bariakan?” ujar Palui handak sarik.

“Aku manuruti pasan sampiyan jua wayah datang mandangar urang bacaramah di masigit, bawa kita bapahala ganal banar bila mambariakan barang nang paling kita sayangi.

Makanya ulun bariakanlah baju sampiyan nang paling disayangi itu,” ujar bini Palui batarus tarang.

“Ooooo… kaya itukah? Ikam bujur-bujur biniku nang salehah dan baiman paham ajaran agama,” ujar Palui kada jadi sarik.

“Tapi ikam ihlas hajalah bila barang kasayangan ikam nang sabuting ini diminta ulih bibinian lain?” ujar Palui pulang manggayai bininya.

“Kalu nang sabuting itu, hidup mati kupertahankan,” ujar bini Palui sambil baungah.

Tinggalkan komentar

Belum ada komentar.

Comments RSS TrackBack Identifier URI

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s